Bu ilin I rübündə Türkiyədə Azərbaycan kapitalının aktivliyi azalıb.
Türkiyə Palatalar və Birjalar Birliyinin məlumatına görə, deyilən dövrdə Türkiyədə təsis edilən Azərbaycan sərmayəli şirkətlərin sayı ötən ilin eyni dövrünə nisbətən 21 faiz, Azərbaycan investorlarının ilkin ödənişi 2,3 dəfə azalıb.
Belə ki, investorların kapitalı 2,4 milyon türk lirəsidir. Vəsaitin 90 faizini azərbaycanlı səhmdarlar qoyub. Ötən ilin eyni dövrübdə yaradılan 47 şirkətin kapitalı 6 mln lirə olub. Bunun 5,1 mln lirəsi Azərbaycandan daxil olub.
Azərbaycan sərmayəli firmalar daha çox ticarət, tikinti və turizm sektorlarında fəaliyyət göstərirlər. Onların ən böyüyü SOCAR-dır.
İqtisadçı Natiq Cəfərli son dövrlərdə ölkədə iqtisadi aktivliyin azaldığını, devalvasiyaların sərmayələrin qoyuluşuna təsirsiz ötüşmədiyini bildirib:
"Manatın güclü olduğu dövrdə vəsaitin bir hissəsi daha çox dollara dəyişdirilirdi. Hansı ki, o zaman dolların məzənnəsi 78 qəpik idi. Bu məzənnə xaricdəki investisiya qoyuluşuna müsbət təsir edirdi. Son illər bazarın doyumluluğunu müşahidə edirik. Əldə olan vəsait, əhalinin iqtisadi aktivliyi azaldıqca, sərmayələrin səviyyəsi də aşağı düşməyə başlayıb. Türkiyədə hələ də daşınmaz əmlak alışında Azərbaycan ilk beşlikdə yer alır. Son aylarda məhz investisiya məsələsində ölkədən həm pul çıxarılmasının inzibati qaydada tənzimlənməsi metoduna keçirlər. Pulun çıxarılması, köçürmələrin həyata keçirilməsi çox çətindir. Əsas problem isə ölkənin daxilində gəlirlərin azalmasıdır. Gəlirlər azaldıqca, bütün sahələrdə, o cümlədən, investisiyalarda da azalma müşahidə olunur”.
Deputat Vahid Əhmədov yerli sərmayədarların strateji yol xəritəsinə əsasən Azərbaycana yatırım etdiklərini diqqətə çatdırıb:
”Türkiyəyə sərmayə qoyan əsasən bizim yerli şirkətlərimiz idi. O şirkətlər artıq Azərbaycanda tikinti sektoruna strateji yol xəritəsində nəzərdə tutulmuş obyektlərin, sənaye məhəllələrinin tikintisinə vəsait qoyurlar. O ki qaldı xaricilərin Azərbaycana sərmayə qoymasına, ciddi bir problem yoxdur. Əksinə, manat müəyyən qədər möhkəmlənib, dollar azalıb. Bu da xarici investorların Azərbaycana sərmayə qoymasına imkan yaradır”.
Ötən il Türkiyəyə Asiya ölkələrindən ən çox Azərbaycan yatırım etmişdi. Rəsmi məlumata görə, Türkiyəyə yatırılan 2 milyard dolların 652 milyonu Azərbaycana məxsus olub.
Ofelya Ramilqızı
Toplum.Tv
Toplum TV Azərbaycanın müstəqil xəbər platformasıdır. Ölkədə və bölgədə baş verən hadisələri dəqiq və qərəzsiz şəkildə izləyicilərimizə çatdırırıq.
Toplum TV hər gün siyasət, iqtisadiyyat, sosial, kriminal, gender mövzularında reportajlar və xəbər proqramları, tolk-şou və müsahibələri diqqətinizə təqdim edir.
Ən doğru xəbərləri izləmək üçün Toplum TV-yə abunə olun.