"Sovet dövründə milyonçu, indi gül satan... Nə qazandımsa, elə o vaxt qazandım".
Bu sözləri Toplum.tv-yə 28 May metrosu ətrafında səyyar gül satan Məmməd Baxşəliyev deyir.
83 yaşlı Məmməd Baxşəliyev 10 ildən çoxdur ki, küçədə gül satmaqla məşğul olur.
"Polislər iki şalvar, iki köynək, bir də şərf verdilər mənə"
O, 185 manat pensiya alldığını və bununla yaşaya bilmədiyini deyir: "185 manat pensiya alıram. Dolanmaq çətindir. 185 manatla nə almaq olar? Ona görə də hər gün gül satıram. Ötən günlərin birində polislər iki şalvar, iki köynək, bir də şərf verdilər mənə. Bax elə bu (soyuqdan donmuş əlləri ilə nimdaş paltosunun yaxasını açır. S.M) o köynəklərdən biridir".
"Biri zəng etmir ki, ata, ölmüsən, ya sağsan?"
"Həyat yoldaşım üç ildir ki, xəstəlikdən əziyyət çəkir. Şəkər xəstəsidir. Hər keçən gün yerimə qabiliyyətini itirir. İki qızım, bir oğlum var. Oğlum musiqiçidir, qızlarımdan isə xəbərim yoxdu. İki qızımdan biri zəng etmir ki, ata, ölmüsən, ya sağsan? Mən o 185 manatı dərmana ancaq çatıra bilirəm. Bəzən heç dərmana da çatmır. Əgər gül satmasam, dolana bilmərəm", - deyir Məmməd Baxşəliyev.
"O dövr hara, indi hara..."
M. Baxşəliyevin Sovet dövründə daha yaxşı yaşadığını bildirir: "O vaxt vəziyyətim yaxşı idi. İşlərim çox yaxşı gətirirdi. Ayaqqabı tikib satırdım. O vaxt milyonçu idim, indi dilənçiyəm. Bilirsiniz, 9 bankda pulum batdı. Dövlət nə verdi, heç nə. 5000-ə 200 manat pul verdilər. O dövr hara, indi hara..."
"Atam müharibəyə getdi, qayıtmadı"
O deyir ki, insan ancaq halal zəhmətilə yaşamalıdır: "Mən yetim böyüdüm. Atam müharibəyə getdi, amma qayıtmadı. Gecə-gündüz əkinlə məşğul idim, qarğıdalı satırdım. Zəhməti sevin,xanım. Hə, zəhməti sevin və çox işləyin".
Məmməd Baxşəliyevə baxdıqda istər-istəməz adamın beynində cavabsız suallar yaranır. Təsəvvür edin ki, nəhəng bir gölün içinə 10 minlərlə daş atılıb. O daşlar gölün dərinliklərində bir yerdədir. Amma heç kəs onları görmür. Bəlkə də, görmək istəmir...
Səkinəxanım Məmmədova
Toplum.Tv
Toplum TV Azərbaycanın müstəqil xəbər platformasıdır. Ölkədə və bölgədə baş verən hadisələri dəqiq və qərəzsiz şəkildə izləyicilərimizə çatdırırıq.
Toplum TV hər gün siyasət, iqtisadiyyat, sosial, kriminal, gender mövzularında reportajlar və xəbər proqramları, tolk-şou və müsahibələri diqqətinizə təqdim edir.
Ən doğru xəbərləri izləmək üçün Toplum TV-yə abunə olun.