Bu ilin yanvar-fevral aylarında Azərbaycanda sənaye müəssisələri və bu sahədə fəaliyyət göstərən fərdi sahibkarlar 7,6 milyard manatlıq və yaxud ötən ilin eyni dövrü ilə müqayisədə 4,6% çox sənaye məhsulu istehsal edib.
Bu barədə Dövlət Statistika Komitəsinin açıqlamasında bildirilir.
Məlumatda həmçinin deyilir ki, sənayenin qeyri-neft sektorunda məhsul istehsalı 15,5% artıb.
Sənaye məhsulunun 71,7%-i mədənçıxarma sektorunda, 22,7%-i emal sektorunda, 4,9%-i elektrik enerjisi, qaz və buxar istehsalı, bölüşdürülməsi və təchizatı sektorunda, 0,7%-i isə su təchizatı, tullantıların təmizlənməsi və emalı sektorunda istehsal olunub.
Mədənçıxarma sektorunda neft hasilatı əvvəlki ilin müvafiq dövrünün səviyyəsində qalıb, əmtəəlik qaz hasilatı isə 34,3% artmışdır.
Emal sektorunda avtomobil, qoşqu və yarımqoşquların istehsalı 3 dəfə, mebel istehsalı 85,5%, maşın və avadanlıqların istehsalı 80,8%, rezin və plastik kütlə məmulatlarının istehsalı 64%, içkilərin istehsalı 63,4%, kağız və karton istehsalı 50,2%, toxuculuq sənayesi məhsullarının istehsalı 49,6%, kompüter, elektron və optik məhsulların istehsalı 37,8%, kimya sənayesi məhsullarının istehsalı 33,2%, əczaçılıq məhsullarının istehsalı 26,8%, ağacın emalı və ağacdan məmulatların istehsalı 25,3%, maşın və avadanlıqların quraşdırılması və təmiri işləri 18,2%, tikinti materiallarının istehsalı 12,8% artmış, sair nəqliyyat vasitələrinin istehsalı 4,5%, metallurgiya sənayesi məhsullarının istehsalı 8,9%, hazır metal məmulatlarının istehsalı 12,4%, poliqrafiya məhsullarının istehsalı 15,7%, elektrik avadanlıqlarının istehsalı 24%, geyim istehsalı 27,1%, tütün məmulatlarının istehsalı 32,1%, dəri və dəri məmulatlarının, ayaqqabıların istehsalı isə 39,8% azalıb.
Elektrik enerjisi, qaz və buxar istehsalı, bölüşdürülməsi və təchizatı sektorunda istehsalın həcmi 2,3%, su təchizatı, tullantıların təmizlənməsi və emalı sektorunda isə 12,1% artıb.
Toplum TV Azərbaycanın müstəqil xəbər platformasıdır. Ölkədə və bölgədə baş verən hadisələri dəqiq və qərəzsiz şəkildə izləyicilərimizə çatdırırıq.
Toplum TV hər gün siyasət, iqtisadiyyat, sosial, kriminal, gender mövzularında reportajlar və xəbər proqramları, tolk-şou və müsahibələri diqqətinizə təqdim edir.
Ən doğru xəbərləri izləmək üçün Toplum TV-yə abunə olun.