Şamaxı rayon mərkəzində torpaq sürüşməsi aktivləşib, bəzi ailələr uçan evlərini tərk etmək məcburiyyətində qalıblar.
"Azadlıq Radiosu"nun verdiyi məlumata görə, sürüşmədən Şamaxı şəhərinin mərkəzinə yaxın ərazidəki 48-ci məhəllə ziyan görüb. Məhəllədə 20-dən artıq evə zərər dəyib, həmin evlərin bir hissəsi yaşayışa yarasız hala düşüb.
Sakinlər deyib ki, əvvəlki illərdə də ərazidə sürüşmələr olub. Ancaq bu il Novruz bayramından ( martın 20-i, 21-i) başlayaraq sürüşmə aktivləşməyə başlayıb.
"Yağan yağışlar nəticəsində sürüşmə artdı. Novruzdan bəri hər gün xırda-xırda da olsa sürüşmə müşahidə olunur. 20-dən çox evdə çatlar əmələ gəlib. Məhəllə başındakı 7 ev tamam yarasız hala düşüb", sakinlər bildirib.
Onların sözlərinə görə, yarasız hala düşən evlərdə yaşayanlar yaxınlarının evlərinə köçməli olublar. Başqa ailələr isə hələ də qəzalı evlərdə yaşamaq məcburiyyətində qalıb.
48-ci məhəllədəki sürüşmə sahəsi 200 metrə yaxındır. Sürüşmə davam etdikcə yolların, hasarların da yararsız hala düşdüyü bildirilir. Sakinlər bildirib ki, sürüşmə nəticəsində kommunikasıya xətləri də zərər görüb.
Bildirilir ki, əlaqəli qurumlar heç bir qabaqlayıcı tədbirlər görməyib.
"Rayonun icra hakimiyyətinə müraciət etmişik. Dəfələrlə başqa rəsmi qurumlara müraciətimiz olub. Hər dəfə gəlirlər, müşahidə edirlər, yoxlama aparıb, gedirlər, gərəkli addımlar atılmır", sakinlər vurğulayıb.
Yerli əhali yagışlı havanın davam etməsindən, sürüşmənin getdikcə sürətlənməsindən narahatdır.
Şamaxı Rayon İcra Hakimiyyətindən və başqa rəsmi qurumlarından əhalinin narahatlığına, hələlik, münasibət almaq mümkün olmayıb.
Ekologiya və Təbii Sərvətlər Nazirliyinin Milli Geoloji Kəşfiyyat Xidmətinin əməkdaşlarının da ərazidə monitorinq apardığı bildirilir.
Nazirliyin əməkdaşları da ərazidə sürüşmənin aktivləşdiyini deyirlər.
"Azadliq.org"
Toplum TV Azərbaycanın müstəqil xəbər platformasıdır. Ölkədə və bölgədə baş verən hadisələri dəqiq və qərəzsiz şəkildə izləyicilərimizə çatdırırıq.
Toplum TV hər gün siyasət, iqtisadiyyat, sosial, kriminal, gender mövzularında reportajlar və xəbər proqramları, tolk-şou və müsahibələri diqqətinizə təqdim edir.
Ən doğru xəbərləri izləmək üçün Toplum TV-yə abunə olun.