16:05, 22 Noyabr 2017 (Çərşənbə) 23

"Qarabağ münaqişəsini yalnız Putin həll edə bilər” - Ərdoğan

Türkiyə prezidenti Rəcəb Tayyib Ərdoğan Dağlıq Qarabağ münaqişəsini Soçidə Rusiya və İran prezidentləri Vladimir Putin və Həsən Ruhani ilə müzakirə etmək niyyətindədir.

Bunu, noyabrın 22-də  Türkiyə prezidenti  Ərdoğan deyib.

O deyib ki, bu gün Soçidə Suriya məsələsi ilə bağlı keçiriləcək üçtərəfli görüşdə fürsət düşsə, Dağlıq Qarabağ münaqişəsini yenidən gündəmə gətirəcək: "Soçiyə ötən dəfəki səfərim zamanı Rusiya prezidenti Vladimir Putinlə Dağlıq Qarabağ məsələsini müzakirə etmişdik. Putin bu məsələdə əlindən gələni edəcəyini söyləmişdi. Mən Azərbaycanın işğal altındakı 5 rayonunun boşaldılması məsələsində həssas olmalarını və münaqişənin müddətinin 30 ilə doğru getdiyini dedim. Bu işi bu bölgədə həll edəcək güc Rusiyadır, cənab Putindir. O, mənə məsələ ilə bağlı "həssaslığınızı başa düşürəm” demişdi. Bu gün yenə üçtərəfli görüşdə fürsət düşən kimi məsələni gündəliyə gətirəcəyəm. Çünki Dağlıq Qarabağ məsələsi bizim də xüsusi məsələmizdi. Bunu diqqətdən kənarda qoymağacağıq”.