16:31, 02 Fevral 2018 (Cümə) 316

Peşə məktəblərində maaşlar bilinib

Peşə məktəblərində maaşlar bilinib
Nazirlər Kabineti dövlət ilk peşə-ixtisas təhsili müəssisələrində çalışan bilik və bacarıqlarının diaqnostik qiymətləndirilməsi aparılan əməkdaşların aylıq əməkhaqqı səviyyəsini təsdiq edib.

Bəzi müəllimlərin əməkhaqlarının artırılması ilə bağlı Azərbaycan prezidentinin yanvarın 17-də imzaladığı sərəncama əsaslanan qərar fevralın 1-də verilib.

Qərara görə, 18 saat yükü olan ali təhsilli ilk peşə-ixtisas təhsili müəssisələrinin müəllimlərinin əməkhaqqı stajdan asılı olaraq ayda 350-450 manat təşkil edəcək. Orta təhsillilər üzrə isə 320-400 manat əməkhaqqı müəyyən edilib.

İlk peşə-ixtisas təhsili müəssisələrində idarəetmə aparatı işçilərinin də maaşı müəyyən edilib. Məsələn, direktorların aylıq vəzifə maaşı 500 manat müəyyən edilib.

Nazirlər Kabineti qərarda Təhsil Nazirliyinə iki ay müddətində dövlət ilk peşə-ixtisas təhsili müəssisələrində nəticələrə əsaslanan maliyyələşmə sisteminin yaradılmasından ötrü meyarları müəyyən etməyi tapşırıb.

Prezident İlham Əliyevin yanvarın 17-si imzaladığı sərəncama əsasən, dövlət ilk peşə-ixtisas təhsili müəssisələrində çalışan, bilik və bacarıqlarının diaqnostik qiymətləndirilməsi aparılan müəllimlərin dərs yükü, əməkhaqları artırılıb.

Sərəncamda peşə-ixtisas təhsili müəssisələrində çalışan, diaqnostik qiymətləndirmədən keçən müəllimlərin həftəlik dərs yükü norması 1,5, aylıq vəzifə maaşları isə orta hesabla 2 dəfə artırılır.

Sərəncamın icrası Nazirlər Kabinetinə tapşırılmışdı.

Müəllimlərin həftəlik dərs yükü normasının və aylıq vəzifə maaşlarının artırılması yanvarın 1-dən tətbiq edilməlidir.