Milli Məclis üzvünün parlamentdaxili məsuliyyəti ilə bağlı tələblər artırılıb.
Belə ki, bu tələblər Azərbaycan Respublikası Milli Məclisi daxili Nizamnaməsinin 45-ci (Milli Məclis deputatının parlamentdaxili məsuliyyətinin əsasları) və 46-cı ( Parlamentdaxili məsuliyyətə cəlb olunan Milli Məclisin deputatına tətbiq edilən intizam tədbirləri) maddəsinə təklif olunan yenilikdə göstərilib.
Yeni əlavələrə görə, Milli Məclisin deputatları Azərbaycan Konstitusiyasının 93-cü maddəsinin III hissəsinin tələblərini, xüsusən də deputat üçün qanunla müəyyən edilmiş etik davranış qaydalarını pozduqda cəzalandırılacaqlar.
Maraqlıdır, Azərbaycan Parlamentində deputatların daxili intizam qaydalarını pozmasına tez-tez rast gəlinirmi? Belə deyilsə, bu əlavələr hansı zərurətdən doğub?
Sabiq deputat Gültəkin Hacıbəyli Toplum.tv-yə bildirib ki, bu, millət vəkillərinin davranış qaydalarına riayət etməməsindən doğan dəyişiklik deyil:
”Biz vaxtaşırı olaraq dünyanın müxtəlif ölkələrinin parlamentlərində deputatlar arasında mübahisələri görürük, hətta mübahisələr əlbəyaxa döyüşlərə qədər gəlib çıxır. Tərəflər bir-birlərinə qarşı kəskin, ağır ifadələr işlədir. Türkiyə, Ukrayna, Hindistan, Gürcüstan parlamentlərində çox sərt ziddiyyətlərin şahidi olmuşuq. Ancaq onların heç biri deputatların mandatından məhrum edilməsi ilə nəticələnməyib. Azərbaycanda isə, ümumiyyətlə, belə hallar baş verməyib. Hüseyn Abdullayevin provokasiyaya çəkilərək deputat mandatından məhrum edilməsi epizodunu istisna etsək, belə bir hal xatırlamıram. Həmin provokasiyanın baş vermə səbəbi isə Hüseyn Abdullayevin hökuməti tənqid etməsi idi. Məhz həmin hadisə də bugünkü dəyişikliklərin mahiyyətinə işıq salır. Deputatlar cəzalanırlarsa, onlar hansısa etik davranış qaydalarını pozduqlarına, bir-birlərinə qarşı zor tətbiq etdiklərinə görə cəzalandırılmırlar. Deputatlar yalnız hökuməti tənqid etmək cəsarətində olduqları üçün cəzalandırılırlar. Hazırda parlamentə təklif edilən və müzakirəyə çıxarılan dəyişikliklərin əsas mahiyyəti onsuz da icra hakimiyyətinin əlavəsinə çevrilən parlamentin icra hakimiyyətindən bir az da asılı vəziyyətə salmaq, deputatları gözükölkəli etmək və onları mandat itirmək təhlükəsini hər an üzərlərində hiss etməyə məcbur etməkdir. Azərbaycan hakimiyyəti bilir ki, ölkədə sosial durum pisləşir və deputatlar buna hansısa formada etiraz edə bilərlər. Bu baxımdan bu təkliflər onları əvvəlcədən mandatlarını itirmək qorxusu ilə üz-üzə qoyaraq bu addımdan çəkindirməyə xidmət edir. Hesab edirəm ki, bu, qeyri-demokratik bir addımdır. Məqsədi deputatları daha da səssiz, müti vəziyyətə gətirməkdir”.
Deputat Fazil Mustafa Azərbaycan parlamentində sözügedən halların baş vermədiyini nəzərə çatdıraraq bunun sadəcə olaraq qanuna əlavə olduğunu bildirib:
”Bu qanun konstitusiyaya instinad olnunaraq qəbul olunub. Burada deputatın hansı formada davranmağının əsasları göstərilir. Əvvəllər bu ayrı-ayrı qanunlarda var idi, indi isə bu, vahid bir qanunda təqdim edildi. Deputatların etik davranışlarında hazırda heç bir problem yoxdur. Bu, sadəcə vahid formada qanuna əlavə olunub”.
Hüquqşünas Ələsgər Məmmədli bu müddəanın yeni olmadığını, ümumiləşdirmə olduğunu deyir:
”Əslində Milli Məclisin daxili Nizamnaməsinə əlavə olunan yeni müddəa 26 sentyabr 2016-cı il tarixində konstitusiyaya olunan yeni dəyişiklikdən sonra gündəmə gəlib. Çünki konstitusiyada deputatın məsuliyyəti məsələsi gündəmə gəldi. Deputat etik pozuntaya yol verərsə, onun deputatlıq səlahiyəti əlindən alınmasına dair müddəa Konstitusiyaya əlavə olunub. Təbii ki, konstitusiyanın birbaşa hüququ olsa belə, bunun tənzimləyici norması da Milli Məclisin daxili Nizamnaməsidir. Amma bu, yenilik deyil, artıq bu Konstitusiyanın özündə var. Sadəcə, norma şəklində nizamnaməyə də daxil olub”.
Ofelya Ramilqızı
Toplum.Tv
Toplum TV Azərbaycanın müstəqil xəbər platformasıdır. Ölkədə və bölgədə baş verən hadisələri dəqiq və qərəzsiz şəkildə izləyicilərimizə çatdırırıq.
Toplum TV hər gün siyasət, iqtisadiyyat, sosial, kriminal, gender mövzularında reportajlar və xəbər proqramları, tolk-şou və müsahibələri diqqətinizə təqdim edir.
Ən doğru xəbərləri izləmək üçün Toplum TV-yə abunə olun.