Azərbaycan Mərkəzi Bankının İdarə Heyətinin sədri Elman Rüstəmov dekabrın 12-də keçirilən mətbuat konfransında deyib ki, ötən il pul kütləsində ən çox artım dəmir pullarda olub.
Onun sözlərinə görə, Mərkəzi Bank iri ticarət sistemləri ilə əlaqə yaradır və ticarət sistemi ilə birgə işləyir: "Görürük ki, iqtisadiyyatın dəmir pullara ehtiyacı böyükdür. Buna görə, əlavə sifarişlər də edərək iqtisadiyyatı dəmir pullarla təmin edirik. İqtisadiyyat əgər bunu tələb edirsə, biz bunu etməliyik".
Baş bankirin fikirləri cəmiyyətdə birmənalı qarşılanmayıb, sosial şəbəkələrdə müzakirələrə səbəb olub. Sosial şəbəkə istifadəçiləri bunu əhalinin gəlirlərinin aşağı düşməsi ilə əlaqələndiriblər.
İnsanların xırda pula olan tələbatının artmasını izah edən iqtisadçı Natiq Cəfərlinin fikrincə, bu, böyük marketlər şəbəkəsindəki müəyyən endirimlərlə əlaqəlidir: "Məsələn, əvvəl 5 manata satılan məhsulu indi 4 manat 95 qəpiyə satırlar. Bu tip endirimlərlə daha çox müştəri cəlb etməyə çalışırlar. Bunun nəticəsində də əhalinin böyük marketlər şəbəkələrinə üz tutması baş verir”.
Onun sözlərinə görə, bu da kiçik marketlərin sıradan çıxması prosesinə səbəb olur: "Böyük marketlərə axın da xırda qəpiklərə tələbi artırır. Bu, Elman müəllimi də, hökuməti də ciddi narahat etməlidir. Çünki dünyanın hər yerində insanlar daha çox kartdan istifadə edirlər. Azərbaycanda çox təəssüf ki, hökumət insanların kartla alış-verişi üçün təşviq proqramı həyata keçirmir”.
İqtisadçı deyir ki, maaş, pensiya alan adamlar bankomatların önündə növbədə dayanıb, pul çıxardırlar və həmin pulla marketlərə gedib bazarlıq edirlər: "Əhali rəsmi rəqəmlərə görə qazancının yarısını ərzağa xərcləyir. Hökumət əhalini kartla alış-veriş etməyə təşviq etməlidir ki, xırda pul problemi olmasın”.
Deputat Aydın Hüseynov isə dəmir pulun dözümlülüyünün digərlərə nisbətən daha möhkəm olduğunu deyib: "Əslində bunu əhalinin kasıblaması ilə əlaqələndirmək olmaz. Belə deyək ki, alış-veriş yerlərində bəzi məhsulların qiymətlərini yuvarlaqlaşdırırlar. Bu, hesabatlarda məhsulun qiymətinin real qiymətlərlə hesablanması ilə bağlıdır”.
Gülzar N. Məmmədli
Toplum Tv
Toplum TV Azərbaycanın müstəqil xəbər platformasıdır. Ölkədə və bölgədə baş verən hadisələri dəqiq və qərəzsiz şəkildə izləyicilərimizə çatdırırıq.
Toplum TV hər gün siyasət, iqtisadiyyat, sosial, kriminal, gender mövzularında reportajlar və xəbər proqramları, tolk-şou və müsahibələri diqqətinizə təqdim edir.
Ən doğru xəbərləri izləmək üçün Toplum TV-yə abunə olun.