16:48, 19 Mart 2018 (Bazar ertəsi) 180

İcbari sığortaya aid hesabat

İcbari sığortaya aid hesabat
«2017-ci il ərzində pilot layihə çərçivəsində səhiyyə xərclərinin maliyyələşdirilməsinə 26.2 milyon manat vəsait sərf edilib. Bunlardan 21 milyon xəstəxanaların, 3 milyon ilkin səhiyyə xidməti üzrə təkmilləşdirilmə işlərinin, 2.2 milyon isə müqaviləli tibb müəssisələrinin payına düşür».

İcbari Tibbi Sığorta üzrə Dövlət Agentliyinin (İTSDA) Mingəçevir və Yevlaxda həyata keçirilən icbari tibbi sığorta pilot layihəsi ilə bağlı açıqladığı hesabatda belə yazılır.

Hesabata görə, layihə çərçivəsində 1829 ödənişsiz tibbi xidmətə təminat verilir. Bunlardan 480-i ambulator, 677-si stasionar, 6-sı təcili və təxirəsalınmaz, 18-i ilkin səhiyyə, 23-ü isə fizioterapevtik tibbi xidmətlərə aiddir.

Hesabatda qeyd edilən göstəricilərə əsasən, pilot ərazilərdə 2016-cı illə müqayisədə stasionar qəbul 21 faiz, cərrahi əməliyyatlarının sayı isə 33 faiz artıb.

Sənəddə o da vurğulanır ki, bu sahədə hüquqi bazanın təkmilləşdirilməməsi 2019-cu ildə ölkə miqyasında icbari tibbi sığorta sisteminə (İTS) tam keçidə mane olur. Agentlik yeni qanun layihəsi və başqa aidiyyəti normativ hüquqi aktların layihələrini hazırlayıb. Onlar Milli Məclisə təqdim ediləcək.

Azərbaycanda «İcbari tibbi sığorta haqqında» Qanun 18 il əvvəl qəbul edilib. Ancaq indiyə kimi bütün ölkədə tətbiq edilməyib.

Prezident İlham Əliyev hələ 2007-ci il dekabrın 27-də Nazirlər Kabineti yanında Tibbi Sığorta üzrə Dövlət Agentliyinin yaradılması ilə bağlı sərəncam verib. Dövlət başçısı bir də bundan 9 il sonra, fevralın 15-də bu agentliyin əsasnaməsini təsdiq edib.

Bundan sonra Azərbaycanda icbari tibbi sığorta sistemi pilot şəhərlərdə (Mingəçevir və Yevlax) tətbiq edilməyə başlayıb. 2018-ci ilin büdcə layihəsinin müzakirələrində hökumət təmsilçiləri deyiblər ki, bu məsələnin yalnız 2019-cu ildə tam reallaşacağına ümid edirlər.

Üstəlik, bir çox xəstəliklərin müayinə və müalicəsi icbari tibbi sığorta paketinə daxil edilməyib. Söhbət onkoloji, xroniki böyrək çatışmazlığı və şəkərli diabet xəstəliklərindən gedir.

Prezident İ.Əliyevin sərəncamına əsasən, bu il Yevlax və Mingəçevirdən əlavə, Ağdaş rayonunda da İTS üzrə pilot layihə həyata keçiriləcək. Bundan ötrü dövlət büdcəsindən 18.3 milyon manat ayrılıb.