14:42, 08 İyun 2018 (Cümə) 196

Hökumət qurumları "Xəzər" avtomobili sifariş verib

Hökumət qurumları
Azərbaycan hökumət qurumlarından ümumilikdə 40-a yaxın "Xəzər" avtomobili sifariş verilib. 

Bunu "Azərmaş" ASC-nin İdarə Heyətinin sədri Emin Axundov bildirib.

E.Axundov bu qurumların adlarını da açıqlayıb: "Xəzər" avtomobillərini sifariş verən qurumlar arasında İqtisadiyyat, Energetika və Vergilər Nazirlikləri, Mərkəzi Seçki Komissiyası (MSK) var".

Şirkət rəsmisi, həmçinin ilin sonunadək avtomat ötürücü qutusuna malik olan avtomobillərin istehsalına başlanacağını da qeyd edib. Onun sözlərinə görə, avtomat ötürücü qutusuna malik avtomobillər mexanikadan 1 000-1 500 manat baha satılacaq: "İlin sonuna qədər "Peugeot" və digər model avtomobillərin də istehsalına başlanılacaq. Avtomobilləri ilkin 20% ödəniş etməklə 4 illik lizinq şərtləri ilə almaq olar. Bu zaman illik faiz dərəcəsi təxminən 18%-ə bərabər olacaq. Kreditlə almaq istəyənlər isə ilkin ödəniş kimi avtomobilin dəyərinin 50%-ni ödəməlidirlər".

Neftçala Avtomobil Zavodunda "Xəzər SD" və "Xəzər LD" markalı avtomobillər istehsal olunur. "Xəzər SD" 16 min manat, "Xəzər LD" isə 18 min manata təklif edilir. Zavodun illik istehsal gücü 10 min avtomobildir.

Report