19:45, 19 Mart 2018 (Bazar ertəsi) 139

Gözdən Əlillər Cəmiyyətinin sədrinin məhkəməsi davam edir

Gözdən Əlillər Cəmiyyətinin sədrinin məhkəməsi davam edir
Azərbaycan Gözdən Əlillər Cəmiyyətinin dələduzluqda təqsirləndirilən sədri Səmyar Abdullayev, vəzifəli şəxsi Himmət Şükürov və Nərimanov rayon İcra Hakimiyyətinin sabiq əməkdaşı Niyaməddin Şıxəliyevin cinayət işi üzrə məhkəmə prosesi davam etdirilib.

"APA"-nın verdiyi xəbərə görə, Bakı Ağır Cinayətlər Məhkəməsində bir neçə zərərçəkmiş şəxs ifadə verib. Məhkəmə hakim Novruz Kərimovun sədrliyi ilə keçirilib. 

Onlar ifadələrində dəymiş ziyanın ödənilməsini və pulların maklerlərə verildiyini bildiriblər.

Prosesdə təqsirləndirilən Səmyar Abdullayev bildirib ki, pullar hazırda Almaniyada yaşayan Məzahir Nəsibova çatıb və özünün bu işlə heç bir əlaqəsi yoxudur. 

"Bunu məhkəmədə ifadə verən zərərçəkmiş şəxslər də təsdiq edir. İndiyədək 40-a yaxın şəxs ifadə verib və pulların Məzahirə çatdığını bildiriblər. Heç kim mənə pul verildiyini təsdiq edə bilməz. Bu baxımdan mən özümü təqsirli bilmirəm", - S.Abdullayev bildirilib.