22:17, 05 Aprel 2018 (Cümə axşamı) 145

"Əziz Orucov İnsan Hüquqları Məhkəməsinə şikayət etmək fikrindədir"

Cəzası şərti həbslə əvəzlənən jurnalist Əziz Orucov aprelin 5-də Bakıdakı 14 saylı Cəzaçəkmə Müəssisəsindən evə buraxılıb.

"Kanal 13” internet televiziyasının direktoru olan Əziz Orucov 2017-ci il mayın 2-dən həbsdə idi. Əvvəlcə o, polisə müqavimətdə təqsirli bilinərək 30 sutka inzibati həbs cəzası almışdı. İnzibati həbsin sona çatmasına az qalmış Baş Prokurorluğun Ağır Cinayətlərə Dair İşlər üzrə İstintaq İdarəsində ona cinayət işi başlanmış, haqqında həbs qətimkan tədbiri seçilmişdi. Dekabrın 15-də Bakı Ağır Cinayətlər Məhkəməsi jurnalisti dövlət qeydiyyatına alınmamış qrant vəsaitlərindən külli miqdarda qanunsuz gəlir əldə etməkdə təqsirli bilərək 6 il müddətinə azadlıqdan məhrum etmişdi.
 
Bakı Apellyasiya Məhkəməsinin qüvvədə saxladığı bu hökmü Ali Məhkəmə 2018-ci il aprelin 5-də dəyişib. Əziz Orucovun cəzası 6 ildən 3 ilə endirilib, eyni zamanda onun cəzasının qalan hissəsi şərti həbslə əvəz olunub. Nəticədə Əziz Orucov saxlandığı 14 saylı Cəzaçəkmə Müəssisəsindən azad edilib.

Jurnalistin xanımı Lamiyə Orucova Novator.az-a deyib ki, Əzizin səhhətində problemlər var: "Böyrək ağrılarından, qan təzyiqindən əziyyət çəkir. Əllərində əsmə var, görünür, nevroz problemləri də yaranıb. Çox güman, xəstəxanada müalicəyə ehtiyac olacaq.  Əziz Orucov həbsdən buraxılmasını işin bitməsi saymır və bəraət almaq niyyətindədir,İnsan Hüquqları Məhkəməsinə şikayət etmək fikrindədir”.

"Kanal 13” internet televiziyasının fəaliyyətdə olduğunu bildirən Lamiyə Orucova həyat yoldaşının müalicədən sonra işini davam etdirəcəyini vurğulayıb.
 
novator.az