13:16, 11 Yanvar 2017 (Çərşənbə) 96

Cəzaçəkmə müəssisələrində tənbeh tətbiqi dəyişdi

Cəzaçəkmə müəssisələrində tənbeh tətbiqi dəyişdi
Ədliyyə Nazirliyinin Kollegiyası "Cəzaçəkmə müəssisələrinin Daxili İntizam Qaydaları”nda dəyişiklik edib.
 
APA-nın məlumatına görə, bu qaydalar cəzaçəkmə müəssisələrinin, habelə istintaq təcridxanalarının (bu müəssisələr təsərrüfat və məişət xidməti işlərinə görə orada saxlanılan məhkumlar üçün cəzaçəkmə müəssisələrinin vəzifələrini yerinə yetirirlər) işçi heyəti, orada saxlanılan məhkumlar və bu müəssisələrə baş çəkən şəxslər üçün məcburidir.
 
Dəyişiklik məhkumlara tənbeh tədbirlərinin tətbiqi ilə əlaqədardır. Həvəsləndirmə və tənbeh tədbirlərini tətbiq etmək hüququna cəzaçəkmə müəssisələrinin rəisləri malikdirlər. Tənbeh tədbirinin tətbiqi ilə əlaqədar barəsində qəbul edilən qərara dair məhkuma öz rəyini bildirmək və ya ondan şikayət etmək hüququ izah olunur. Məhkumun tənbeh tədbirlərinin tətbiqindən ədliyyə nazirinə, Penitensiar Xidmətin rəisinə və məhkəməyə şikayət vermək hüququ var. Dəyişikliyə əsasən, bundan sonra məhkum şikayət verdiyi hallarda, barəsində şikayət olunan tənbeh tədbirinin icrasının dayandırılması ilə bağlı məsələyə, maraqlı şəxsin ərizəsinə əsasən və ya xidməti vəzifəsinə görə şikayət instansiyasının öz təşəbbüsü ilə, şikayət instansiyası tərəfindən dərhal baxılacaq və bu barədə müvafiq qərar qəbul ediləcək. Tənbeh tədbirinin icrasının dayandırılması barədə qərar qəbul edildiyi hallar istisna olmaqla, şikayətin verilməsi tənbeh tədbirinin icrasını dayandırmır.