Hindistanın Azərbaycandakı səfirliyinin, Beynəlxalq Krişna Şüuru Cəmiyyətinin Bakı Nümayəndəliyinin təşkilatçılığı ilə "Atəşgah məbədi” Dövlət Tarix-Memarlıq Qoruğunda Azərbaycan və Hindistandan bir sıra yoqa mütəxəssisləri və həvəskarlarının iştirak ilə açıq havada Beynəlxalq Yoqa Günü qeyd olunub.
Tədbirdə Hindistanın Azərbaycandakı fövqəladə və səlahiyyətli səfiri Sancay Rana, diplomatik korpusun nümayəndələri, Azərbaycandakı hind diasporasının üzvləri və hind mədəniyyətsevərləri iştirak edib.
Açıq havada baş tutan tədbirdə iştirakçılar hind mədəniyyəti, musiqisi, rəqsləri, mətbəxi və həmçinin, yoqa dərsləri ilə tanış olublar. Tədbirdə Azərbaycanda yaşayan hindlilərlə yanaşı ingilis, ərəb turistlər də iştirak ediblər. Qonaqlara hind mətbəxinin təamları paylanılıb. Sonra yoqanın fəlsəfəsindən, ruhun yaradanla təmasından danışılıb. Tədbirə qatılanlar birlikdə yoqa göstəriblər. Krişna Cəmiyyətinin nümayəndələri hind rəqsi ediblər. Cəmiyyətin nümayəndələri bu təlimlə yoqanı birləşdirən cəhətlərdən də danışıblar. Onlar bildiriblər ki, yaradan sevgidir, sevgi rəqsdir: "Biz ancaq Allaha sevgi tərəfdarlarıyıq. Dünyanı sevgi xilas edəcək".
Krişnaçılar ət, balıq yumurta yemir, soğan, sarımsaq, kofe və çaydan, həmçinin süni qidalardan istifadə etmirlər. Onlar yalnız "Krişnaya təklif olunmuş təam"lar yeyirlər ki, həmin təamlar da meyvə-tərəvəz, göyərti, paxla, süd məhsulları, çərəz kimi nemətlərdir. Onların fikrincə, sağlam ruh üçün sağlam qida vacibdir. Krişnaçılar inanırlar ki, sağlam həyat tərzi aqressiya və pisliklərlə savaşa bilər.
Birləşmiş Millətlərin Baş Assambleyasında qəbul olunmuş qətnaməyə uyğun olaraq 21 iyun dünyada Beynəlxalq Yoga Günü kimi qeyd olunur. Bu münasibətlə Bakıda da bir sıra tədbirlər keçirilir. Hər il olduğu kimi bu il də Yoqa Həftəsi Bakıda yerləşən müxtəlif Yoqa təsisatları tərəfindən keçiriləcək bir sıra silsilə tədbirlərdən ibarət olacaq. Tədbirlər çərçivəsində keçiriləcək Yoqa sessiyalarına yoqa həvəskarları təmənnasız qatıla biləcəklər.
Türkan Bəşir
Toplum Tv
Toplum TV Azərbaycanın müstəqil xəbər platformasıdır. Ölkədə və bölgədə baş verən hadisələri dəqiq və qərəzsiz şəkildə izləyicilərimizə çatdırırıq.
Toplum TV hər gün siyasət, iqtisadiyyat, sosial, kriminal, gender mövzularında reportajlar və xəbər proqramları, tolk-şou və müsahibələri diqqətinizə təqdim edir.
Ən doğru xəbərləri izləmək üçün Toplum TV-yə abunə olun.