15 fevral Beynəlxalq Uşaq Xərçəngi ilə Mübarizə Günüdür.
Bu gün ilk dəfə Uşaq Valideynlərinin Ümumdünya Konfederasiyasının təşəbbüsü ilə 2001-ci ildən təqvimə daxil edilib.
Birinci dəfə həmin beynəlxalq gün yanvarın 15-də Lüksemburqda qeyd edilib, ancaq sonra onu bir ay irəli çəkmək qərara alınıb.
Ümumdünya Səhiyyə Təşkilatının (ÜST) məlumatına görə, dünyada uşaqlarda olan onkoloji xəstəliklər bütün bədxassəli şişlərin 1-1,5 faizini təşkil edir. Uşaqlarda təsadüf olunan onkoloji xəstəliklər böyüklərə nisbətən çox fərqlidir və onların əsas hissəsini embrional şişlər təşkil edir.
Bunların içində leykemiyalar daha tez-tez rast gəlinən xərçəngin növüdür. Hazırda inkişaf etmiş Qərb ölkələrində aparılmış xüsusi müalicədən sonra 10 uşaqdan 7-si şəfa tapır. Lakin bütün dünyada xərçənglə xəstələnmiş uşaqlardan 10 nəfərdən 2-si sağala bilir.
Problemin aktuallığı ildən–ilə artır. Tibbi statistikaya əsasən, hər il dünyada təxminən 200 min uşaq xərçəng xəstəliyi ilə üzləşir və onların yarısı həyatını itirir. Erkən və vaxtında aparılan diaqnostika onkoloji xəstəliklərin müalicəsində mühüm rol oynayır. Xəstəliyin birinci və ya ikinci mərhələdə aşkar edilməsi onun uğurlu müalicəsinə səbəb olur. Ancaq xərçəng xəstəliyi əksər hallarda üçüncü, 8% hallarda isə hətta dördüncü mərhələdə aşkar edilir.
Onkologiyanın təxminən 200-ə yaxın forması var və xəstəliyin hər hansı bir orqanda başlaması mümkündür. Uşaqlar daha çox leykemiya və ya qan xərçəngi ilə üzləşirlər. Sonrakı yerləri mərkəzi sinir sistemi xəstəlikləri, yumşaq və birləşdirici toxumalar, oynaq qığırdaqları və sümüklərdə olan törəmələr tutur.
Uşaqlar tamamilə müxtəlif yaşlarda - bir aylığından 18 yaşa qədər xəstəliyə düçar olurlar və onların hamısının intensiv müalicəyə ehtiyacı var. Uşaqlar arasında xərçəng xəstəlikləri az olsa da, bütün xərçəng xəstəliklərinin 0.5%-1.5%-ni təşkil edir.
Dünyada il ərzində hər 1 milyon uşaqdan 150-200 nəfərində xərçəng xəstəliyi qeydə alınır.
7 mart 2012- ci ildə Azərbaycanda Milli Onkologiya Mərkəzinin nəzdində Uşaq Onkoloji Klinikası açılıb.
Statistikaya görə 2013-cü ildən 2017- ci ilə qədər Azərbaycanda 620 uşaq onkoloji xəstəliyə görə qeydiyyata götürülüb.
2018-ci ilin göstəriciləri açıqlanmayıb.
Hesabatda həmçinin il ərzində Azərbaycanda nə qədər uşağın bu xəstəlikdən öldüyü açıqlanmır.
Əbülfət Baxşəli
Toplum TV Azərbaycanın müstəqil xəbər platformasıdır. Ölkədə və bölgədə baş verən hadisələri dəqiq və qərəzsiz şəkildə izləyicilərimizə çatdırırıq.
Toplum TV hər gün siyasət, iqtisadiyyat, sosial, kriminal, gender mövzularında reportajlar və xəbər proqramları, tolk-şou və müsahibələri diqqətinizə təqdim edir.
Ən doğru xəbərləri izləmək üçün Toplum TV-yə abunə olun.